Bachpan!!

Itwar ki ek dopahari mein yuhin baithe baithe phone mein ek album khul gaya.
Kuch tasveere dikhi aur mann ussi mein ghul gaya.
Tasveer kuch purani thi, sath uske yaadon ki kahani thi,
Kuch kisse dosti ke aur kuch pyaar ki nishaani thi,
Un tasveer mein masumiyat wale bachpan aur kur kuch nadaan si jawani thi,
Kehne ko toh kagaz tha, lekin usmein hi zindagi ki rawaani thi,
Rango tarango se bhare woh bhi kya pal the,
Ruk ke tasveer kya khichwana, shaitaniyon ke liye waise hi waqt kam the,
Bekhudi mein khoye aur khushiyon mein dube the,
Befikri ki duniya mein woh bhi kya haseen lamhe the,
Na hoti thi rone ki wajah aur hasne ka bahana,
Khel khel mein laga hi rehta tha ruthana – manana,
Mand mand muskaan liye tha ghumne ka zamana,
Apni harkaton se, shararaton se tha sabko satana,
Yaaron ke sang kisse tha waqt ka thikana,
Aajka daulat kya hai, bachpan hi toh tha asli khajana,
Asli khajana!!